எங்கள் வாழ்வும் எங்கள் வளமும் மங்காத தமிழென்று சங்கே முழங்கு
கவிஞரும் கலைச்சொற்களும்
சிங்கப்பூர் பயணம்
ஆகஸ்டு திங்கள் 18-08-2024 நாளன்று சொல்லாடும் முன்றிலின் முதலாம் ஆண்டுவிழா மற்றும் கவிஞர் மகுடேசுவரனாரின் “சிங்கப்பூர் கண்டதும் கற்றதும்” நூல் வெளியீட்டு விழா சிறப்பாக நடைபெற்றது. தமிழ்ப்பட்டிமன்றக் கலைக்கழகம் ஏற்பாட்டில் இந்நிகழ்ச்சி சிங்கப்பூர் உமறுப்புலவர் நிலையத்தில் நடந்தேறியது.
கவிஞரிடம் தமிழ் பயின்ற மாணவர்கள் இணைந்து “கவிஞர் மகுடேசுவரன் மாணவர் பாசறை” என்ற பெயரில் தமிழ் சார்ந்த செயல்களை முன்னெடுத்து வருகின்றனர்.
மொழியறிஞர் சிங்கப்பூர் வருவது உறுதியானவுடனேயே மாணவர் பாசறை சார்பாக அவரது படத்தை வரைந்து நினைவுப் பரிசாகத் தருவது என முடிவெடுக்கப்பட்டது.
கவிஞரை முகநூலில் பின்தொடரும் பலருக்கும் தெரியும் கவிஞர் பல நூற்றுக்கணக்கான கலைச்சொற்களை ஆக்கியளித்துள்ளார். வருங்கால தலைமுறையினருக்கு மிகவும் பயன்படும் இப்பெருஞ்செயலைப் போற்றும் வகையில்
இணையம், சமூக ஊடகங்கள், உணவுப் பொருள்கள், மட்டைப்பந்தாட்டம் போன்ற பல்வேறு துறைகளில் கவிஞர் ஆக்கியளித்ததும், அடையாளங்கண்டு முன்மொழிந்ததுமான நூறு
கலைச்சொற்கள் தெரிவு செய்யப்பட்டன.
கவிஞரது முகமும் சுற்றிலும் பொருத்தமான நிறமுடைய கலைச்சொற்களுடன் இவ்வோவியம் கிட்டத்தட்ட பத்து மணிநேரத்தில் “கவிஞரும் கலைச்சொற்களும்” என்ற தலைப்பில் மாணவர்களில் ஒருவரும் ஓவியருமான இரா.அபிராமியாரால் அணியமாக்கி, அழகிய சட்டகமிடப்பட்டு விழாவன்று அன்புப்பரிசாக அளிக்கப்பட்டது.
இவ்வோவியத்திலுள்ள கலைச்சொற்களையும் அவற்றிற்கு இணையான ஆங்கிலச் சொற்களையும் இங்கே பார்க்கலாம்.
